Zëvendëskryeministrja Ledina Mandija është takuar sot me përfaqësues të lartë të Këshillit të Evropës dhe Bashkimit Evropian në Shqipëri.
Në takim morën pjesë Claus Neukirch, përfaqësues në Shqipëri i Këshillit të Evropës, ndërsa vetëm një ditë më parë u takua edhe me Jan Rudolph, zëvendës drejtues i Delegacionit të BE dhe z. Robert Adams, Ekspert për Zgjedhjet.
Këto takime Mandia i ka zhvilluar në cilësinë e drejtueses së Task Forcës për zgjedhjet parlamentare të 25 qershorit.
Përfaqësuesit e lartë të Këshillit të Evropës dhe Delegacionit të Bashkimit Evropian në Shqipëri, të cilët kanë ndjekur nga afër çdo mbledhje të Task- Forcës, shfaqën interes për ecurinë e punës e saj në drejtim të rezultatit të monitorimit si dhe problematikave të konstatuara gjatë procesit zgjedhor për zgjedhjet parlamentare 2017.
Ndërsa Zv.kryeministrja nga ana tjetër, i njohu me punën paraprake të zhvilluar në këtë kuadër dhe sqaroi se po punohet me objektivitet për të evidentuar të gjitha rastet e shkeljeve të identifikuara gjatë fushatës zgjedhore dhe ditën e zgjedhjeve, duke iu referuar informacionit dhe raportimit të bërë nga Ministritë dhe institucionet, përcjellë në datë 10 Korrik 2017, ndërkohë që disa nga ministritë kanë dështuar të sjellin këtë raport monitorimi.
Mandia premtoi se së shpejti, do të përfundohej raporti, ku do të jenë të pasqyruara informacioni i mbledhur, i diskutuar në mbledhjet e Task – Forcës dhe i përpunuar nga zyra e Kryetarit të Task – Forcës. (D.D/Shuplaka)
Discussion about this post