Policia e Shtetit ka finalizuar një tjetër operacion për goditjen e kultivimit të bimëve narkotike. Operacioni policor i koduar “Gjuricaj”, u zhvillua nga shërbimet e Stacionit të Policisë Manëz në bashkëpunim me Komisariatin e Policisë Durrës, në vijim të kontrolleve të territorit dhe bazuar në informacionet e siguruara në rrugë operative.
Gjatë operacionit, në një zonë të pyllëzuar në fshatin Gjuricaj, u zbuluan 150 bimë të dyshuara narkotike Cannabis Sativa, të cilat po kultivoheshin në mënyrë të paligjshme.
Në momentin e ndërhyrjes, shërbimet e Policisë kapën në flagrancë shtetasin A. Gj., 37 vjeç, banues në Gjuricaj, teksa po kujdesej për bimët narkotike. Ai u arrestua në flagrancë, ndërsa bimët u asgjësuan me anë të djegies.
Materialet procedurale i janë referuar Prokurorisë pranë Gjykatës së Shkallës së Parë të Juridiksionit të Përgjithshëm Durrës, për veprime të mëtejshme ligjore, për veprën penale “Kultivimi i bimëve narkotike”.
Policia e Durrësit vijon kontrollet në terren dhe u bën thirrje qytetarëve të denoncojnë çdo rast të kultivimit apo trafikimit të lëndëve narkotike.
