Sot në Akademinë e Shkencave do të mbahen zgjedhjet për kreun e këtij institucioni. Ashtu siç prej disa kohësh po denoncon, edhe sot akademiku Fuga ka bërë apelin e tij. Këtë herë për opozitën.
”Mirë ekzekutivi, po opozita, partia demokratike si nuk thotë një fjalë për atë që po ndodh në Akademinë e Shkencave, për zgjedhjet pa platformë dhe pa kandidatë alternativë, lëre për të tjerat”, shkruan Fuga.
Po ashtu Fuga pak ditë më parë i nisi një letër të hapur dhe kryeministrit Rama ku i shprehte shqetësimet e tij në lidhje me zgjedhjet në Akademinë e Shkencave, ku kryetari kërkon të bëhet nënkryetar dhe nënkryetari kryetar.
Një përgjigje për akademikun ka pasur dhe Ylli Manjani. Ai thotë se opozita është e lodhur dhe se njëra nga opozitat akuzon Veliajn dhe mbron Ramën, tjetra akuzon Ramën dhe mbron Veliajn.
Ndoshta Manjani me opozitën që i del në krah Veliajt i referohet LSI-së, pasi përherë është përfolur për marrdhënie të mira mes Metës dhe drejtuesve të tjerë në LSI dhe kryebashkiakut të Tiranës.
“Lëre opozitën, mos e nga! Është e lodhur, e mplakur megjithë makiazhin me moshën e re…
Ajo është e shkartisur, e përçarë sa mban më. Njëra opozitë akuzon Ramën dhe mbron Veliajn e gjithë të tjerët. Tjetra opozitë sulmon Veliajn e gjithë të tjerët, por jo Ramën…
Opozita po krijon përshtypjen se pushteti politik në Shqipëri do ndahet ndërmjet Ramës dhe Veliajt…
Asgjë alternative! As ide e as mendim! Vetëm zhurmë dhe goditje taktike që i dinë vetëm ata vetë se cfarë synojnë…
Çtë thonë ata për Akademinë e Shkencave në këto kushte?! Shkenca e oponencës dhe opozitës ka kohë që është në krizë…
Ditë e javë të mbarë, pa shkencën e morën ujrat e zeza dhe është derdhur në det…”, shkruan Manjani.
Zgjedhjet mbahen sot në orën 11, mbase dhe pak kohë për të reflektuar nga të gjithë ata që kanë mundësi të ndryshojnë procesin.
(E.K/SHUPLAKA)
Discussion about this post