Pas shkarkimit nga detyra si Ministër i Drejtësisë, Ylli Manjani me shumë gjasa do të largohet nga LSI-ja dhe do të bashkohet me LIBRA-n e Ben Blushit.Të paktën kështu shkruan Artur Zheji në portalin e tij.
Sipas burimeve të Zhejit, Manjani mundet të kalojë me LIBRA-n, kjo për shkak se ndihet i pakënaqur nga mbrojtja e pakët që ju bë atij nga LSI-ja dhe nga Meta, i cili praktikisht e shiti tek PS-ja.
“Manjani mund të jetë kështu një figurë e spikatur opozitare pranë Blushit”, shkruan portali i Zhejit. Nëse kjo është e vërtetë ose jo, mbetet për t’u zbuluar në ditët në vazhdim.
Manjani u shkarkua nga detyra e ministrit, pas deklaratave të tij të ashpra kundër kryeministrit Rama dhe ministrit Tahiri, për çështjen e mosarrestimit të Klement Balilit dhe fenomenit të kanabizimit në vend.
Megjithatë, në shkresën e Ramës jepet një tjetër motiv për shkarkimin e ministrit: “Në funksion të përmirësimit të mëtejshëm të cilësisë së bashkëqeverisjes dhe të koordinimit sa më të mirë të punës me Kuvendin, aktorët e tjerë shoqërore e grupet e interesit, për çuarjen përpara të Reformës në Drejtësi, kam gjykuar të nevojshëm lirimin e Ministrit Manjani dhe zëvendësimin e tij me Ministrin Vasili”. (D.D/Shuplaka)
