Manjani: Jam për krijimin e një force policore dhe ushtarake, ja pse

Në një intervistë për portalin “ypi.al”, i gazetarit Edison Ypi, ministri i Drejtësisë Ylli Manjani ka folur për atë që është një nga temat e nxehta të përhershme në Shqipëri: Korrupsionin!

Sipas Manjanit, në kohën e Enver Hoxhës ka pasur më shumë korrupsion se sa sot.

Në intervistë, Manjani flet edhe për reagimet që mori kur propozoi futjen e ushtrisë në veprim për luftën kundër hashashit.

Në këtë kuadër ai propozon krijimin e një force policore dhe ushtarake që të kontrollojë territorin jo urban.

“Jam për krijimin e një force policore dhe ushtarake që të kontrollojë territorin jo urban. Franca ka xhandarmerinë, Italia ka karabinierinë. Një gjë të ngjajshme duhet ta krijojmë dhe ne”, shprehet Manjani.

A ka në Shqipëri më pak apo më tepër krim se fqinjët ballkanikë?
Nuk e di si është situata kriminale në vendet e tjera në rajon, por kemi ende shumë krim. Për fat të keq disa krime tek ne gjejnë përhapje. Canabis psh është bërë shumë i rrezikshëm sepse kriminalizon shoqërinë. Krimet e tjera të “individualizuara” janë me mjete që krijojnë makbritet! Sopata, druri, thika por edhe vaji i djegur janë mjete krimi, krahas armës së zjarrit. Krimi në familje gjithashtu është makabër.

A ka një hartë apo gjeografi të përhapjes, dendësisë, arsyeve, të krimit ?
Mendoj se thënia “fukarallëk maskarallëk” është ajo që përcakton hartën e krimit. Kur themi fukarallëk kam parasysh më së pari fukarallëkun mendor. Në zona të caktura ka edhe specifikë: në malësi, për shembull, krimi ka shumë zhurme sepse duhet dhënë mesazhi në mixhlis. Në zona urbane është silencioz dhe i sofistikuar. Në bregdet i egër si në tokë ashtu dhe në det të hapur.

Si mund të mbrohen qytetarët nga rrugaçëria, shqetësimet, bezdisjet, që vijnë prej tyre? A funksiononin ankimi në polici?

Mbrojtja e qytetarëve nga sulmi që ju bëhet jetës shëndetit, familjes apo pronës kryher nga policia.
Ankimi me polici funksionon. Vijueshmëria e trajtimit të mëtejshëm të ankimit jo dhe aq. Ka dy momente që duhet ti zgjidhim më mirë: së pari në polici duhet të kemi më shumë prezencë të shërbimit të ndërmjetësimit. Ky shërbim ndihmon në zgjidhjen e disa mosmarrëveshjeve të vogla me pajtim. Shpesh mosmarrëveshjet e vogla përfundojnë në krime të mëdha. Së dyti, policia duhet të ndërhyjë menjëherë edhe kur dikujt i cenohet prona! Mjafton të provosh që je pronar dhe policia duhet të largojë menjëherë nga prona dhunuesin. Sot policia të thotë “shko me gjyq”. Nuk është normale!

A janë shqiptarët bashkëpunues me Drejtësinë?
Me drejtësinë jo dhe aq. Traditë e vjetër kjo. Me pushtetin po. Do ishte më e dobishme të kishte më shumë bashkëpunim me drejtësinë sesa me pushtetin politik. Megjithatë kjo nuk mund të na çojë në zgjidhje të “rrezikshme” që propozohen në disa nene të reformës, ku me një dëshmitar anonim, të dënosh dikë tjetër. Kjo është e papranueshme. Jetojmë në kohën e shkencës ekzakte, e cila ofron prova bindëse, shumë më bindëse se subjektivizmi i dëshmitarëve, aq më tepër anonime.

Të mbeti qejfi që nuk e futën e ushtrinë ta bënte zap hashashin?

Kam thënë që duhet të ndahemi nga hashashi dhe këtë duhet ta bëjmë me çdo mjet, edhe me ushtri po qe nevoja. Më mbeti qejfi për reagimet mohuese të fenomenit dhe për futjen ose jo të ushtrisë. Jam për krijimin e një force policore dhe ushtarake që të kontrollojë territorin jo-urban. Franca ka xhandarmerinë, italia ka karabinierinë. Një gjë të ngjajshme duhet ta krijojmë dhe ne. Sidoqoftë jam i kënaqur që tashmë të gjithë e pranojmë se fenomeni ekziston. Tani do na duhet të bllokojmë mbjelljet e reja. Nëse do fillojnë mbjelljet masive atëherë jo vetëm s’kemi bërë asgjë, por do ecim në rrugë që nuk kthehemi dot kollaj mbrapsht. Të mos harrojmë se po hyjmë në periudhë zgjedhore dhe hashashi mumd të ndikojë jo pak në to.

Më herët, ministri Ylli Manjani ishte shprehur se për luftën kundër kanabisit duhet të ndërhyjë edhe ushtria, ide që u hodh poshtë nga ministrat Saimir Tahiri dhe Mimi Kodheli. (A.R/SHUPLAKA)