Ministri i Drejtësisë, Ylli Manjani, i ftuar në studion e emisionit “Opinion”, është shprehur se Kryetari i LSI-së Ilir Meta, është njeriu i duhur për të qeverisur një qeveri.
“Unë e shoh Metën si një njeri super të talentuar për të qeverisur Shqipërinë. Aftësitë ekzekutive të Ilir Metës janë të njohura.”, janë fjalët e ministrit.
Sakaq, Manjani ka folur edhe për çështjen e Klement Balilit, çështje e cila sipas tij shqetëson jo vetëm opinionin publik, por edhe sigurinë kombëtare.
Pas kërkesës së Metës për Nishanin, që ai të mbledhë pikërisht Këshillin e Sugurisë Kombëtare në lidhje me Balilin, ministri e cilëson si një rast të veçantë.
Manjani e mohoi se kjo lëvizje e Metës bëhet për të hequr qafe akuzat ndaj tyre për mosarrestimin e Balilit, duke thënë se ky nuk është vendi për të larë mëkatet.
“Klement Balilin e njoh shkresërisht. Shkresërisht, për aq sa i takon, letër-porosive që kam transmetuar ndërmjet komunikimit zyrtar me Prokurorin e shtetit tonë dhe Prokurorisë së shtetit grek. Kjo është ajo që di. Jam i vetmi zyrtar që kam folur hapur dhe gjithmonë kam kërkuar edhe kur ju nuk e kishit mendjen, për shkak të aksesit në informacion, ky person të arrestohej. Historia e këtij personi fillon dhe mbaron në një datë të vetme. 17 maj të vitit të kaluar, ishte dita kur Klement Balili është vendosur në kërkim ndërkombëtar nga Interpoli dhe pas gjithë rregullave të Interpoli, personi arrestohet”, tha Manjani. (D.D/Shuplaka)
