I mandatuari për qeverinë e re të Maqedonisë, Zoran Zaev, pritet që sot (ose gjatë fundjavës) të dorëzojë në kuvend propozimin për programin e ri qeveritar, përfshirë këtu edhe përbërjen e kabinetit të ri të qeverisë.
Gjatë një deklarate për mediat nga Brukseli, kreu i LSDM-së u shpreh nga Brukseli se mundësitë që deri të mërkurën të finalizohet qeveria e re e Maqedonisë janë të mëdha.
“Në përgjithësi jemi shumë afër marrëveshjes me BDI-në dhe me koalicionin Aleanca për shqiptarët. Pak më larg në këtë drejtim jemi me Lëvizjen Besa. Me këtë parti ende nuk kemi biseduar për emra dhe ndarje të resorëve, kemi biseduar për numrin total të resorëve dhe për disa drejtime të caktuara programore dhe principe që duhet patjetër të jenë pjesë përbërëse e qeverisë së re. Nesër pasdite do të jem në Shkup dhe do t’i vazhdoj bisedimet me të gjitha partitë politike. Qëllimi ynë përfundimtar është deri në fund të kësaj jave, deri tek Kuvendi të dërgohen përbërja e kabinetit dhe programi qeveritar. Nëse e plotësojmë këtë premtim të të gjithë liderëve, besoj se Maqedonia deri të mërkurën do të ketë qeveri të re reformatore.”, deklaroi kreu i LSDM-së, Zoran Zaev.
Ndërkaq, nesër pritet të mbahet Kongresi i 22-të i LSDM-së, ku Zaev është kandidati i vetëm për t’u vendosur në krye të partisë.
(XH.A/SHUPLAKA)
