Maqellarë/ Rrëzohet makina nga 8 metra lartësi, funerali më i ‘shpejt’ se ambulanca

Një ngjarje e rëndë raportohet nga dëshmitarët se ka ndodhur para rreth një ore në vendin e quajtur “Ura e Pesjakës” në Maqellarë, Peshkopi.

Një mjet tip Mercedes Benz me targa AA138RP ka dalë nga rruga dhe ka përfunduar rreth 8 metra poshtë urës. Sipas personave të pranishëm në vendngjarje, mendohet se në mjet ishin duke udhëtuar nënë e bir, të moshave përkatësisht 79 dhe 50 vjeç.

Për fat të keq gruaja ka humbur jetën, ndërsa djali është plagosur dhe ndodhet në gjendje të rëndë. Mjeti dyshohet se ka dalë nga rruga për shkak të shpejtësisë dhe lagështirës.

Por sikur të mos mjaftonte aksidenti, një fakt absurd ka habitur dëshmitarët. Në vendngjarje gjendej vetëm një polic dhe makina e funeralit ishte paraqitur përpara se të mbërrinte ambulanca dhe forcat e tjera të policisë.

/J.O.Q/