Ministrja e Bujqësisë dhe Zhvillimit Rural, Anila Denaj u shpreh sot, një ditë pas nëshkrimit të Marrëveshjes së Bashkëpunimit për Sigurinë Ushqimore, Veterinari dhe Fitosanitare me homologun e Kosovës, Faton Peci, se dje u ndërmor një tjetër angazhim i përbashkët me nënshkrimin e kësaj marrëveshjeje, që forcon bashkëpunimin mes Shqipërisë dhe Kosovës.
“Kjo marrëveshje adreson sfidat e pazgjidhura dhe krijon një kornizë të re për një treg më të sigurt dhe të unifikuar për prodhimet tona, duke mbështetur fermerët dhe fuqizuar tregtinë mes dy vendeve”, tha ajo.
Kjo marrëveshje e lidhur mes ministrive do të zbatohet nga institucionet përgjegjëse të varësisë për fushat e përgjegjësisë së lidhjes së kësaj marrëveshjeje.
Për Ministrinë e Bujqësisë dhe Zhvillimit Rural në Republikën e Shqipërisë do të jetë zbatues Autoriteti Kombëtar i Veterinarisë dhe Mbrojtjes së Bimëve (AKVMB), Autoriteti Kombëtar i Ushqimit (AKU) dhe Instituti i Sigurisë së Ushqimit dhe Veterinarisë (ISUV).
Për Ministrinë e Bujqësisë, Pylltarisë dhe Zhvillimit Rural në Republikën e Kosovës do të jetë zbatues Agjencia e Ushqimit dhe Veterinarisë, (AUV) dhe Laboratori Ushqimit dhe Veterinarisë (LUV). /j.p/
