Marrin fund dilemat sesi do të jetë vota e LSI-së nesër në Kuvend. Kreu i grupit parlamentar të LSI, Petrit Vasili në një intervistë për “Report Tv” ka deklaruar se nuk do të votojnë Gramoz Ruçin si kryetar Kuvendit dhe qeverinë e re “Rama 2”.
Sipas tij, qeverinë “Rama 2” nuk e kanë votuar 80 % e shqiptarëve, prandaj edhe LSI do të votojë kundër në Kuvend.
“Vota jonë do të jetë kundër Ruçit si Kryetar i Parlamentit. Nuk e votojmë qeverinë “Rama 2”.
Qeverinë “Rama 2” nuk e kanë votuar 80% e shqiptarëve”deklaroi Vasili.
Nesër do të mblidhet Kuvendi për seancën konstituive, ndërsa në ditët në vijim pritet edhe votimi i qeverisë së re.
Kryeministri Rama në fjalën e tij sot para Grupit Parlamentar e vendosi theksin te zgjedhja e Ruçit në krye të Kuvendit dhe gabimi që do të bënte PD-ja në rast se nuk e votonte, duke mos e përmendur qëndrimin e LSI-së.
“Në atë sallë do të fillojë një kapitull i ri i jetës parlamentare me zgjedhjen e Gramozit në krye të tij. U them kolegëve demokratë që nëse nuk e votojnë Gramozin nesër gabojnë njëherë, pasi refuzojnë deputetin më jetëgjatë të Kuvendit dhe eksperiencën e tij, dhe gaboni 100 herë kur përbaltni punën e tij.
Është me shumë rëndësi që të nënvizohet se disiplina e grupit dhe e qeverisë janë faktor kyç të funskionimit. ”, u shpreh ndër të tjera Rama në nisje të mbledhjes.
(E.K/SHUPLAKA)
