Kryetari i Kuvendit, Ilir Meta ka zhvulluar një takim në Bruksel me Presidentin e Parlamentit Evropian, Martin Schulz. Fokus i këtij takimi ishte vlerësimi i progres-raportit të fundit të Komisionit Evropian për Shqipërinë.
Në këtë takim Schulz theksoi se mungesa e bashkëpunimit politik dhe polarizimet e panevojshme në skenën e brendshme politike shqiptare, dëmtojnë integrimin e vendit.
Po kështu Meta theksoi se Kuvendi do vazhdojë të mbështesë fort e pa vonesa zbatimin e reformës kyçe në drejtësi, dhe shprehu mirënjohjen për mesazhet inkurajuese të Presidentit Schulz gjatë vizitës së tij të fundit në Tiranë.
Meta vlerësoi dhe rolin e eurodeputetëve Knut Fleckenstein dhe Eduard Kukan, të cilët kanë qenë instrumentalë në inkurajimin e konsensusit dhe dialogut politik, në mbështetje të reformës në drejtësi dhe ligjit të dekriminalizimit.
Martin Schulz, e falënderoi Kryetarin Meta për rolin e tij në shërbim të stabilitetit e dialogut të brendshëm politik si dhe në interes të marrëdhënieve të mira në rajon.
Në përfundim të këtij takimi kryetari Meta dhe Schulz biseduan për thellimin e bashkëpunimit mes Kuvendit të Shqipërisë dhe Parlamentit Evropian, duke vënë theksin në mbështetjen, që u duhet ofruar të rinjve shqiptarë në rritjen e kapaciteteve të tyre profesionale dhe në eksperiencën që mund të përfitojnë në institucionet e Parlamentit Evropian.
Në këtë takim Meta shoqërohej edhe nga Ministrja për Integrimin Evropian, Klajda Gjosha.
