Prej disa ditësh qytetarë të shumtë në Kukës dhe në Tiranë kanë protestuar në lidhje me arrestimin e 23 të qytetarëve kuksianë pas protestës në ‘’Rrugën e Kombit”. Ndërkohë gjatë ditës së sotme pritet që të jepet masa e sigurisë për qytetarët e arrestuar.
Me një urdhër të drejtorit të Përgjithshëm të Policisë, Ardi Veliu, Drejtoria e Policisë së Tiranës dhe 6 Komisariatet kanë kaluar në gatishmëri.
Vendimi është marrë pas protestës së nisur të dielën në orën 19:00, para Drejtorisë Vendore të Policisë së Tiranës, nga qytetarë të Kukësit dhe përfaqësues të shoqërisë civile.
Burime thanë se duke qenë se parashikohet përshkallëzim i protestës, drejtori i Përgjithshëm, Veliu, i ka kërkuar drejtorit të Policisë së Tiranës, Kastriot Skënderaj, që të marrë të gjitha masat për parandalimin e incidenteve të mundshme dhe kalimin e shërbimeve në gatishmëri, shkruan ‘’panorama”.
(E.K/FAXWEB.AL)
