Presidenti i Kosovës, Hashim Thaçi u shpreh i zhgënjyer me qëndrimin që ndërkombëtarët kanë mbajtur për masakrën e Reçakut. Në Ditën Ndërkombëtare për të Drejtat e Njeriut, Thaçi vizitoi fshatin Reçak në Prishtinë, ku 20 vjet më parë forcat serbe iu morën jetën 45 civilëve shqiptarë.
Gjatë kësaj vizite, Thaçi tha për mediat se ndërkombëtarët po heshtin për këtë masakër. Ai i kërkoi Serbisë të marrë përgjegjësitë dhe të kërkojë falje.
“E ardhmja ndërtohet vetëm duke pranuar përgjegjësinë e në të njëjtën kohë duke kërkuar falje lidershipi i Serbisë për krimet që ka kryer në shtetin e Kosovës.
Për fat të keq duhet të them me zhgënjim se edhe heshtja ndërkombëtare dhe mos vizita e tyre, sidomos këtu në Reçak, që është, e theksoj, pika kulminante e masakrave të shtetit të Serbisë, ia ka hapur gojën dhe e ka amnistuar në një formë a formën tjetër lidershipin aktual të Serbisë, që të pretendojë me krenari të mohojë krimet kundër njerëzimit dhe gjenocidin në Kosovë”, tha presidenti Hashim Thaçi.
Ndërsa në rrjetin social “Facebook”, Thaçi bëri një postim po për të njëjtën çështje, ku shtoi se e ardhmja nuk mund të ndërtohet nëse nuk ka drejtësi për viktimat.
“E ardhmja nuk mund ndërtohet duke i mohuar krimet dhe duke i etiketuar apo fyer civilët e vrarë, por ndërtohet duke e pranuar përgjegjësinë, kërkuar falje dhe vendosur drejtësi.
Rajoni ynë mund ta arrijë pajtimin dhe të ndërtojë një të ardhme më të mirë vetëm duke u ballafaquar me të kaluarën e hidhur dhe duke siguruar drejtësi për viktimat!”, tha Hashim Thaçi.
(M. I./ Faxweb.al)
