Për masakrën që ndodhi dje në SHBA, në Las Vegas ku deri më tani raportohen 56 viktima dhe 527 të plagosur ka reaguar edhe ambasadorja shqiptare në SHBA Floreta Luli.
Duke theksuar se kjo ishte një ngjarje e dhimbshme ajo ka deklaruar se asnjë shqiptar nuk ka qenë afër vendit të ngjarjes dhe si pasojë nuk ka asnjë të lënduar.
Reagimi:
Për disa javë kemi ndjekur me shumë shqetësim një numër fatëkeqësish natyrore në SHBA. Ngjarja e mbrëmshme në Las Vegas, ku një vrasës qëlloi në drejtim të masës së madhe të njerëzve që ndiqnin koncertin me muzikë country, ku u vranë mbi 50 vetë dhe u plagosën mbi 500 të tjerë, ka një tjetër dimension. Është e dhimbshme, është e trishtë, është e frikëshme dhe, për momentin, edhe e panjohur se çfarë e ka nxitur këtë masakër.
Nga informacionet e deritanishme marre nga autoritetet, si dhe në kontakt me përfaqësuesit e komunitetit shqiptar më Las Vegas, për fatin e mirë nuk rezulton të ketë shqiptarë as në listat e viktimave dhe as në listat e të plagosurve. Ndërsa ka disa dhjetra bashkëatdhetarë që punojnë në pozicione të ndryshme në hotelet e Strip në Las Vegas, fatëmirësisht duket se asnjëri prej tyre nuk ka qënë afër vendit të ngjarjes.
Emrat e viktimave që kanë filluar të identifikohen të bëjnë të kuptosh se sa të pafajshëm ishin secili prej tyre. Kam shprehur keqardhjen e thellë dhe dërguar ngushëllime të sinqerta për familjet që kanë humbur të dashurit e tyre. Ngelemi me shpresën që kjo tragjedi të mbahet mënd si e fundit në historinë e ngjarjeve të tilla në SHBA! (J.V/Shuplaka)
