Gjashtë muaj pas vrasjes së një të riu në një lokal tallavaje, arrestohet edhe autori i dytë i krimit. Ai është një 35-vjeçar i quajtur Llazar Dine, i cili dyshohet që në bashkëpunim me pronarin e tallavasë, Olsi Zyberin, të kenë vrarë 23-vjeçarin Marsel Osmani, klient i këtij të fundit.
“Specialistët e Seksionit për Krimet e Rënda, në Drejtorinë Vendore të Policisë Korçë bënë kapjen dhe ndalimin e shtetasit në kërkim: Llazar Dine, 35 vjeç, banues në fshatin Dërsnik-Korçë. Në vijim të hetimeve dhe dokumentimit me prova ligjore të kësaj ngjarje, Gjykata e Rrethit Gjyqësor Korçë, me vendim penal nr 57 të datës 22.02.2017, ka caktuar për këtë shtetas masën e sigurisë: “Arrest në burg”, për veprën penale: “Plagosja e rëndë me dashje, me pasojë vdekje” parashikuar nga neni 88/2 i Kodit Penal. Sqarojmë se shtetasi i mësipërm, rezulton bashkëautor me pronarin e lokalit shtetasin Olsi Zyber, i cili u arrestua nga Policia menjëherë pasi ka ndodhur ngjarja. Të dy këta shtetas, janë konfliktuar për motive të dobëta me 23 vjeçarin M.O, i cili si pasojë e plagëve të marra, ka gjetur vdekjen në Spitalin e Traumës në Tiranë’, thuhet në njoftimin e policisë.
Marsel Osmani nga fshati Dishnicë i Korçës u dhunua barbarisht nga pronari i një lokali me muzikë Zyberi në bashkëpunim me Dinen, fillimisht e kanë qëlluar me shkop të riun, pastaj me thikë pas koke dhe në fund e kanë lidhur pas makinës duke e tërhequr zvarrë, për ta hedhur më pas në kanal. Mendohet se shkaku i konfliktit mes tyre ka qenë për një femër në lokal. (D.D/Shuplaka)
