Turistët britanikë që udhëtojnë drejt Spanjës mund të duhet të karantinohen nëse Britania vazhdon të ushtrojë masa të rrepta, tha ministrja e jashtme e shtetit. Arancha González Laya u shpreh se Spanja po konsideron të aplikojë masat për turistët britanikë pasi shteti të hapet për vizitorët ndërkombëtarë më 21 qershor.
Këtë fundjavë, Spanja do të publikojë rregullat e karantinës për të gjithë vizitorët e huaj. “Ne do të shohim çfarë do të bëjë Britania dhe do të kemi dialog për të parë nëse duhet të vendosim reciprocitet pasi kanë masa të ndryshme nga vendet e Bashkimit Europian”, tha Laya në një intervistë për BBC.
Pas kësaj, qeveria spanjolle është kritikuar nga drejtuesit e turizmit dhe politikanët e Costa del Sol, zonë që varet shumë nga turizmi anglez. Ishte Francisco Salado, drejtues i turizmit në këtë rajon, i cili tha se Madridi po “luan shah” dhe se e ka treguar gjatë muajve të fundit se nuk di ta menaxhojë industrinë e turizmit. Kujtojmë se Britania është një prej shteteve më të goditura nga pandemia dhe paralajmëron se do të izolojë 14 ditë cdo person që vjen nga jashtë vendit.(A.M/Faxweb.al)
Discussion about this post