Kompania ndërkombëtare e tregtimit të karburanteve, Gulf ka reaguar lidhur me skemën e mashtrimit në Shqipëri dhe bën përgjegjës partnerin shqiptar për skandalin me naftën.
Zëvendëspresidenti i grupit Gulf, Frank Rutten deklaroi se kompania ka përfunduar marrëdhënien me partnerin shqiptar Sun Petroleum, për shkak se kjo e fundit nuk i ka paguar tarifën e licencimit duke hequr të gjitha përgjegjësitë e grupit nga ajo që ka ndodhur në Shqipëri dhe duke ja lënë fajin tërësisht kompanisë shqiptare, Sun Petroleum.
Kjo është një situatë për të ardhur keq. Është e rëndësishme të kuptohet se Sun Petroleum Albania është një kompani e pavarur, të cilës Gulf i kishte dhënë një licencë për tregtimin e karburantit në Shqipëri nën markën e Gulf’, deklaroi numri dy i Gulf Oil International.
Sipas tij, grupi Gulf ka dhënë licenca të ngjashme për shumë kompani të tjera anembanë botës, që të tregtojnë karburant nën markën e tij, por kjo nuk e lidh këtë kompani me përgjegjësi.
‘Ne kemi mësuar se kompania Sun Petroleum ka shitur një numër të konsiderueshëm kuponash të parapaguar konsumatorëve, të cilët tani nuk mund t’i konvertojnë dot ato në karburant. Ky veprim është bërë pa miratimin e Gulf Oil International. Meqenëse çështja është nën hetim, ne nuk mund të komentojmë më tej, por dua të theksojë se do të bëjmë çdo përpjekje për të mbrojtur markën Gulf’, -shtoi Rutten.
Prokuroria e Tiranë ka vënë nën hetim partnerin shqiptar të Gulf, kompaninë sun petroleum për mashtrim të qëllimshëm me shitjen e kuponave. Organi i akuzës ka shpallur në kërkim menaxherin shqiptar të Gulf, Alban Alikon, administratorin Irakli Svanidze dhe menaxherin e shitjeve për Tiranën.
Dëmi i llogaritur nga ky mashtrim shkon rreth 5 milionë euro. Kujtojmë që ‘Fax News’ ishte i pari që njoftoi për skandalin e ‘Gulf’ në Shqipëri.
(B.H/Faxweb)
