Lule Makashi dhe e bija Adeila Makashi janë dërguar për gjykim. Emrat e tyre nisën të përbëjnë lajm pas zbulimit të mashtrimit të dhjetëra shqiptarëve përmes firmës “Ande-Lm shpk”.
Ato akuzohen se mashtruan rreth 360 shqiptarë duke u marrë rreth 20 mijë dollarë teksa u premtonin viza pune në shtetin kanadez, por në përfundim s’i jepnin asgjë në këmbim.
Nënë e bijë u arrestuan në flagrancë në aeroportin e Rinasit, sapo zbritën nga avioni nisur nga Kanadaja, menjëherë pasi u shpallën në kërkim për mashtrimin e shqiptarëve.
Policia Kufitare Rinas i ndaloi me datë 27.04.2016, ora 23:30. Lule Makashi 52 vjeçe dhe vajza e saj 28 vjeçe u bë për arsye se ishin shpallur në kërkim.
Në përfundim, Prokuroria pranë Gjykatës së Shkallës së Parë Tiranë ka mbyllur hetimet dhe e ka dërguar çështjen në gjykim.
“Nga tërësia e hetimeve ka rezultuar se shoqëria me administratore të pandehurën Lule Makashi është një shoqëri tregtare me përgjegjësi të kufizuar, me objekt të veprimtarisë së saj si agjenci shërbimesh, hapje dhe funksionimi i agjencive të punësimit duke ndërmjetësuar e punësuar brenda dhe jashtë vendit.
Për çdo aplikant plotësohej një kontartë shërbimi në të cilën përcaktoheshin të drejta dhe detyrime si dhe mënyra e veprimit në rast tërheqje të aplikantit apo në rastet kur nuk pajiseshin me vizë apo nuk lidhej kontrata e punës.
Pagesa kryhej në bankë në numrin e llogarisë së shoqërisë. Nga praktikat e ardhura nga banka lidhur me gjendjen e llogarisë rezulton se nga kjo llogari janë kryer tërheqiet e lekëve nga punonjës të ndryshëm pranë shoqërisë. Pavaresisht faktit se shërbimi për të cilin ishte lidhur kontrata nuk ofrohej aplikantëve nuk u kthehej vlera monetare e paguar, sipas parashikimeve në kontratë.
Në shumë raste aplikantët paguanin për një shërbim dhe ai shërbim nuk ofrohej duke u propozuar aplikimin për një shërbim tjetër (përshembull nga vizë punësimi në vizë studimi, ose anasjelltas) duke mos iu ofruar përfundimisht asnjë lloj shërbimi dhe duke mos iu kthyer asnjë lloj pagese e kryer.”, citohet në dosjen e prokurorisë.
(XH.A/SHUPLAKA)
Discussion about this post