Ministria e Arsimit ka publikuar udhëzimin e parë për zhvillimin e provimeve të Maturës Shtetërore 2017. Vihet re se nuk ka asnjë ndryshim nga ai i kaluari. Maturantët e këtij viti, si dhe ata të mëparshmit, do i nënshtrohen pesë provimeve: tre me detytim dhe dy me zgjedhje.
Në listën e lëndëve me zgjedhje janë 50 lëndë, ndër to 21 për shkollat e mesme, 3 për ato artistike dhe 26 për shkollat profesionale. Nxënësit e shkollave profesionale nuk do jenë të detyruar më t’i nënshtrohen një provimi me zgjedhje të detyruar si “Teoria profesionale”, por mund të zgjedhin një lëndë të profilit dhe një tjetër nga grupi i lëndëve që japin shkollat e mesme.
“Maturanti/kandidati zgjedh dy lëndë nga lista e lëndëve me zgjedhje, pavarësisht nëse i ka zhvilluar ose jo, apo i janë ofruar ose jo nga shkolla në programin mësimor”, sqarohet në pikën 2.8 të udhëzimit nr.26.
Zyrtarë të Ministrisë së Arsimit kanë bërë me dije se gjatë muajit Janar, të gjitha universitetet do të dërgojnë kriteret e pranimeve të reja me qëllim për t’i ndihmuar në kohë maturantët në caktimin e lëndëve me zgjedhje. Pritet që këtë vit, këshillimi i karrierës të jetë më i gjatë se një muaj, krahasuar me një vit më parë. Ky proces do të nisë në çdo shkollë të mesme tre muaj para përfundimit të shkollës. (XH.A/SHUPLAKA)
