Mbi 27 mijë maturantë po përgatiten për mbylljen e zyrtare të shkollës së mesme por edhe për orientimin e duhur drejt universiteteve. Matura Shtetërore është në prag. Të rinjtë po punojnë me testet model që ka publikuar Ministria e Arsimit në mënyrë që maturantët të ambientohen me tezën dhe formatin e provimit. Ndërsa në fillim të qershorit kanë sfidën e vërtete, 4 provimet që mbyllin ciklit parauniversitar, rezultatet e të cilave do të përcaktojnë profesionin e së ardhmes.
Gjatë një takimi më një grup maturantësh, Ministria e Arsimit i garantoi për zhvillimin e një procesi të rregullt dhe të drejtë për të gjithë nxënësit.
“Testet model, që ne tashmë u bënë dy vite që i japim për nxënësit maturantë që në muajin janar, janë një mundësi shumë e mirë që të familjarizoheni me mënyrën e testit për katër provimet e maturës. Ajo që është e rëndësishme këtë vit është se fondin e pyetjeve e kemi të riorganizuar, sepse edhe mësuesit që janë përfshirë, hartuesit e tezave, i kanë riparë me shumë kujdes. Nga ana tjetër, sa i përket administratorëve të testimit, do të jenë mësuesit të cilët do të jenë në ambientet e përzgjedhura të testimit dhe do të jenë mbi 140 shkolla të cilat janë vendosur të jenë ambientet e testimit për provimet e maturës shtetërore. Janë të angazhuar më shumë se 640 vlerësues, pra mësues që do të korrigjojnë testet”.
Ministria Manastirliu foli për ndryshimin e formatit të provimeve të Maturës ku në një të ardhme të afërt sipas saj pritet digjitalizimi i këtij procesi. Manastirliu i ka rekomanduar të rinjtë të ndjekin universitete shqiptare dhe ofertat e tyre.
“Mundësitë që janë sot në Shqipëri për të ndjekur një edukim cilësor janë shumë më të mëdha se ato që ishin dje. Sot universitetet tona janë lidhur me universitete prestigjioze europiane. Ne kemi Universitetin Bujqësor të Tiranës që është lidhur me Universitetin e Shkencave Natyrore, Boku në Vjenë dhe në krye të pak viteve do të jenë diplomat e unifikuara njësoj sikur të kesh studiuar në Vjenë, Austri. Ndërkohë kemi programe dyfishe dhe diploma të përbashkëta me universitete të huaja duke nisur që me universitetet e Italisë, ku programet e përbashkëta dhe diplomat dyfishe krijojnë mundësi që të kemi të njëjtat programe, me të njëjtat standarde dhe që diploma të njihet në të gjithë vendet”.
Provimet për maturantët nisin më 3 qershor më gjuhën e huaj, për të vijuar më 10 qershor më gjuhën shqipe dhe letërsinë. Një javë më pas është testi i matematikës më 17 qershor dhe më 24 provimi i fundit, ai i lëndës me zgjedhje.
