Kryetari i Partisë Demokratike, Lulzim Basha, ka reaguar së fundmi mbi komentin e Pandeli Majkos një ditë më parë në mitingun e Partisë Socialiste. Nga sheshi “Skënderbej”, kandidati i PS-së për Tiranën, u shpreh se “ngjyra mavi është bashkim i blusë me të kuqen”. , duke lënë të kuptohet mundësia e një koalicioni.
I ftuar në emisionin “Koha për t’u zgjuar”, kryedemokrati Basha e mohoi kategorikisht bashkimin e PS-së dhe PD-së në një koalicion. Duke u ndalur konkretisht tek Majko, ai shprehu habinë e tij për shkak se Pandeli Majko nuk është as piktor.
Sa për koalicionin, Basha tha se një koalicion është çështje programesh e vizionesh dhe jo ngjyrash.
“Nuk do ketë demokratë që do votojnë për Edi Ramën. Do ketë shumë socialistë që nuk do votojnë për Edi Ramën. Çështja e koalicioneve nuk është çështje ngjyrash, Majko nuk është as piktor si Rama, është çështje vizionesh dhe programesh. PD do ulë taksat, me Ramën do jenë njësoj ose do rriten. Ndaj nuk ka si të ndodh janë dy parti, dy qasje të ndryshme. Nuk janë dy përqasje që mund të shkrihen.
Ju bëj thirrje të votoni masivisht, Po nuk votuat nuk ka ndryshim. Ditën e diel votoni për ekonominë, harrojini pjesët e tjera të cirkut politik!”, tha Basha.
(XH.A/SHUPLAKA)
