Marrëveshja midis kryeministres Theresa May dhe Brukselit për t’i hapur rrugë zyrtarisht Britanisë për daljen nga Unioni, me sa duket është në pikëpyetje pasi ajo duhet të miratohet në Parlament, ku një pjesë e konsiderueshme të deputetëve janë shprehur për votën e tyre kundër.
Nëse ligjvënësit refuzojnë marrëveshjen e Brexiti, Britania mund të gjendet në ujëra të paeksploruara, ka paralajmëruar kryeministrja britanike, e cila edhe e ka negociuar këtë marrëveshje.
Në një intervistë për gazetën Mail, May ka thënë se refuzimi i propozimeve të saj do të nënkuptonte “paqartësi” të mëdha për shtetin dhe ka paralajmërua anëtarët e Parlamentit se veprimet e tyre mund të çojnë në zgjedhje ku ka një rrezik të vërtetë që të mos ketë Brexit fare, apo dalje të Britanisë nga Bashkimi Evropian.
Raportimet e disa mediave, se kryeministrja do ta shtyjë votimin në Parlament, që është paraparë të mbahet më 11 dhjetor, ku do të votohet për Brexitin është hedhur poshtë nga Zyra e May.
Muajin e kaluar, Qeveria Britanike ka arritur marrëveshje me Brukselin rreth Brexit, ku janë pajtuar për kushtet në bazë të të cilave, Britania do të largohet nga BE-ja në muajin mars.
Ndërkohë që kjo marrëveshje duhet të miratohet edhe në Parlament.
(F.GJ/FAXWEB.AL)
Discussion about this post