Mazhoranca duket se kishte një plan për votimin e bërë pak minuta më parë në sallën e Parlamentit për të zgjedhur kryeprokurorin e ri. Në mbledhjen e grupit që socialistët mbajtën me dyer të mbyllura në mëngjes, deputetët morën urdhër që të votojnë për kandidaturën e Olsian Çelës.
Por mesa duket, mazhoranca ka patur një plan edhe për votimin për ish-kryeprokuroren e përkohshme tashmë, Arta Marku. Në momentin e votimit u vu re se 78 deputetë abstenuan. 78 janë deputetët që ka mazhoranca në Parlament, çka do të thotë se socialistët preferuan të abstenojnë për Markun, por jo të votojnë kundër saj.
Ajo arriti të sigurojë vetëm 11 vota pro, ndërsa 22 deputetë ishin kundër saj. Kujtojmë që Arta Marku u zgjodh vetëm me votat e kësaj mazhorance në dhjetor të 2017. Si për të mos rënë në sy për “qokën” e bërë për Arta Markun, 87 deputetë abstenuan edhe për kandidaturën e Fatjona Memçajt.
Pro Memçës u regjistruan 8 vota, ndërsa 16 deputetë votuan kundër. Garën për Prokurorin e ri të Përgjithshëm e fitoi Olsian Çela me 101 vota pro. Ai pritet të betohet në fund të seancës së sotme plenare.
Për të votuar me shumicë të cilësuar Çelën, disa deputetë të opozitës së re kanë bashkuar votat me mazhorancën.
Ajo që ra në sy gjatë seancës së sotme ishte fakti se opozitarët e rinj nuk ngurruan të bashkojnë votat me mazhorancën edhe për projektligje të tjera që ishin pjesë e rendit të ditës.
Një pjesë e mirë e projektligjeve morën më shumë vota nga çduhet, duke treguar në një farë mënyre që përfaqësuesit e opozitës të ulur në Parlament nuk e kanë problem të bashkojnë votat me socialistët.
(M. I./ Faxweb.al)
Discussion about this post