Sot erdhën nga diaspora edhe 12 mijë pako të tjera zgjedhore, duke bërë që në KQZ aktualisht të jenë grupuar 130 mijë vota nga jashtë vendit. Parku Olimpik tashmë është i mbushur me kuti me vota, të ndara sipas 12 qarqeve të ndryshme. Gjithashtu ruhen edhe zarfet plastikë të postës, si dokumentacion zgjedhor.
Në Greqi, ku janë shfaqur më së shumti problemet, po punohet intensivisht, dhe kompania postare është shpërndarë gjithashtu edhe në disa ishuj ku ka shqiptarë. KQZ i sugjeron votuesit të shkojnë në këto adresa, e të votojnë menjëherë aty, pa vonesa.
Shifrat e fundit tregojnë një përmirësim të votave të sjella nga Greqia, por sërish mbetet nën mesataren e shteteve të tjera.
Të gjitha fletët e votimit që nuk janë dorëzuar tek zgjedhësit deri të enjten, do të kthehen në Shqipëri.
21 mijë votues nuk e kanë marrë ende pakon zgjedhore dhe rrezikojnë të mos e marrin fare atë për shkak të problemeve me adresat. 10 mijë, pra gjysmat, janë nga Greqia. Kjo vjen për shkak të adresave jo korrekte, ose veprimeve të postës që nuk e kanë kërkuar siç duhet votuesin, apo në disa raste zgjedhësit nuk kanë ndjekur saktë udhëzimet me e-mail apo SMS që ka dërguar posta.
