Dy javë pas hapjes zyrtare të Qendrave Shëndetësore Verore 2025, të dhënat tregojnë një interes të lartë dhe angazhim efektiv për garantimin e shërbimeve mjekësore gjatë sezonit turistik.
Sipas një postimi nga Alban Koçiu, zyrtar i Ministrisë së Shëndetësisë, deri tani janë paraqitur gjithsej 4,636 qytetarë për të marrë shërbime mjekësore në këto qendra, të cilat ofrojnë shërbim 24/7 përgjatë gjithë sezonit.
Nga këta 1,111 janë shtetas të huaj, rreth 24% e totalit, që tregon rëndësinë e qendrave për mbështetjen e turistëve. Të cilët 3,525 janë qytetarë shqiptarë, rreth 76%, duke reflektuar një nevojë të qëndrueshme për shërbime shëndetësore në zonat turistike.
Qendrat janë të shpërndara përgjatë vijës bregdetare dhe destinacioneve kryesore turistike, duke ofruar ndihmë të shpejtë dhe profesionale për pushuesit vendas dhe të huaj.
Ky shërbim është pjesë e masave të ndërmarra nga Ministria e Shëndetësisë dhe Mbrojtjes Sociale për të garantuar një sezon turistik të sigurt dhe me mbështetje të plotë shëndetësore për të gjithë vizitorët.
