Në Bethehem në sheshin përpara kishës së lindjes së Krishtit kanë mbërritur me mijëra pelegrinë të krishterë nga e gjithë bota. Që në orët e para të ditës së sotme mijëra njërëz vendas e të huaj janë vënë në radhë përpara vendit të shenjtë ku besohet se erdhi në jetë Jezusi.
“Është e mrekullueshme. Erdha të shoh vendin ku lindi shpëtimtari ynë Jezu Krisht. Unë jam i krishterë, ndaj për mua ky është një vend dhe një moment tepër special. E adhuroj faktin që e kam mundësinë të vij këtu, ndihem me fat dhe vërtet e bekuar”, thotë një turiste, shkruan Top Channel. Në këtë Krishtlindje, Betlehemi sërish do të gjendet përballë vërshimit të njerëzve dhe mungesës së hapësirave nëpër hotele, ashtu si çdo vit.
Turizmi i këtij vendi përbën një burim kryesor të ardhurash për ekonominë palestineze dhe falë tij, sigurojnë jetesën rreth 5.000 familje në Betlehem të cilat kanë rreth 5.000 dhoma në gati 46 hotele e bujtina. Ministrja e Turizmit , Rula Ma’ayah, thotë se territoret palestineze i kanë vizituar këtë vit 2,3 milionë vetë, një numër pak më i lartë ky se vitin e kaluar.
“Situata ka qënë mjaft e mirë, megjithatë shpresojmë që vitin tjetër, kur të festojmë Krishtlindjet, pushtimi të ketë përfunduar. Betlehemi është qyteti i paqes, e prapë ne kemi dhjetëra vjet që vazhdojmë ta kërkojmë”, tha Rula Ma’ayah. Dhuna izraelito-palestineze i ka frenuar turistët në të shkuarën, e sidomos të viteve 2000-2005, Betlehemi u kthye në një vend tejet të vetmuar. (J.V/Shuplaka)
