Komisioni Qendror i Zgjedhjeve në mbledhjen e sotme po diskuton udhëzimin për regjistrimin e partive politike për zgjedhjet parlamentare të 18 qershorit.
Pas problemeve që janë shkaktuar për regjistrimin e partisë më të re, LIBRA-s dhe pretendimit të kreut të kësaj partie, Ben Blushi, një nga anëtarët e KQZ Hysen Osmani ka kërkuar që të shtyhet diskutimi për këtë çështje pasi nuk janë të qartë.
Ndërkohë, kreu i këtij komisioni, Denar Biba theksoi se ka një nxitje për ketë ndryshim nga zgjedhjet e fundit, ndërsa shtoi se duhet të reflektohen rekomandimet e OSBE-ODHIR. Nga ana tjetër, Biba pa përmendur emra, ka ‘thumbuar’ Blushin, duke shtuar se reagimi i partive të vogla bëhet për t’i bërë publicitet vetes.
E menjëhershme ishte replika e nr.2 të LIBRA-s, deputetes Mimoza Hafizi. Hafizi iu drejtua Bibës se për cilat parti të vogla e ka fjalën.
ajo ka qenë përfaqësuesja e LIBRA-s në këtë mbledhje të komisionit. Ajo ka thënë se LIBRA nuk mund të quhet parti e vogël përsa kohë që nuk ka qenë pjesë e ndonjë zgjedhjeje deri më tani.
‘’Ne plotësojmë kushtin pasi ne kemi mandate deputeti të paktën në gjashtë muajit e fundit të mandatit parlamentar’’, ka thënë Hafizi. Ndërkohë që me vendim të anëtarëve të KQZ-së vendimi për regjistrimin e partive të vogla është shtyrë. (E.K/SHUPLAKA)
