Sot pritet që shtetet e NATO-s të nënshkruajnë një marrëveshje me Maqedoninë, duke i mundësuar shtetit fqinj që të bëhet anëtari i 30-të i aleancës ushtarake.
Gjatë ceremonisë e cila do të zhvillohet në selinë e NATO-s në Bruksel, pritet të nënshkruhet edhe kjo marrëveshje e cila vjen në një kohë kur sapo Maqedonia ka miratuar disa ndryshime kueshtetuese ku bën pjesë edhe ai i ndryshimit të emrit.
Çdo shtet anëtar i NATO-s do të duhet të ratifikojë protokollin e pranimit.
Pasi Marrëveshja e Prespës ka kaluar në parlamentin grek, topi tashmë është hedhur në portën e Brukselit.
Kujtojmë se në rastin e anëtarit të fundit – Malit të Zi, protokollin e nënshkruan ministrat e Jashtëm të vendeve anëtare të NATO-s.
Për Maqedoninë e Veriut, është opsioni me ambasadorët sepse është më i shpejtë, duke pasur parasysh faktin se ata janë çdoherë të pranishëm në selinë e NATO-s.
Pas nënshkrimit të protokollit, Maqedonia e Veriut nuk është anëtare, por do të ketë ulëse në tavolinën e përbashkët të NATO-s. Që anëtarësia të formalizohet, nevojitet që të ratifikohet protokolli nga të gjitha vendet anëtare.
Siç parashikohet në Marrëveshjen e Prespës, fillimisht këtë duhet ta bëjë Greqia. Përvoja me Malin e Zi tregon se duhej një vit protokolli i nënshkruar të ratifikohet nga të gjitha vendet anëtare.
Në rastinkonkret, kjo do të thotë se Maqedonia e Veriut do të bëhej anëtare në muajt shkurt – mars të vitit 2020-të. Por, në qarqet diplomatike shpesh dëgjohet se një grup i anëtarëve, në krye me SHBA-në, do të tentojnë ta përshpejtojnë procesin e ratifikimit, që Maqedonia e Veriut të bëhet anëtare që këtë vit. Sipas skenarëve më optimist, ndoshta në shtator ose tetor.
Discussion about this post