Historiani Pëllumb Xhufi, i ftuar në #DritaremeRudinën në Vizion Plus, është shprehur në lidhje me temën e mbulimit të bustit të Skënderbeut, që shkaktoi tension në rrjetet sociale dhe ku u përfshirë dhe figura publike, se ka disa njerëz që duan të përfitojnë nga kjo çështje.
Sipas tij Skënderbeu është një hero që nuk mund të privatizohet nga asnjë besim fetar pasi është i të gjithë shqiptarëve.
“Ka shumë reagime që më kanë irrituar për këtë çështje. Sot lexova një shkrim, ku autori ngre pikëpyetjen se pse nuk shprehen myslimanët, duan të jenë shqiptarë ose jo. Me këtë dua të them se ka hedhurina që duan të përfitojnë nga kjo çështje.
Skënderbeu nuk mund të privatizohet. Ai ka jetuar 60 vjet, ku 20 vjet ka qenë ortodoks, 20 vjet ka qenë mysliman dhe 20 vjet katolik. Komuniteti Mysliman ka një anomali, nuk ka një vend ku të falet. Për mua bëri mirë që e bëri faljen në shesh, sepse në bulevard mund të pengonte njerëzit. Edhe në perëndim ka ceremoni të tilla fetare. Dua të theksoj gjithashtu që Komuniteti Mysliman ka mbajtur një qëndrim dinjitoz”, tha Xhufi.
Ai vlerësoi faktin që komuniteti mysliman ka imamë shqiptar, një gjë shumë e vlerësuar.
Në vijim të asaj që tha më parë që Skënderbeu është hero kombëtar Xhufi tha gjithashtu se Skënderbeu nuk kishte luftuar vetëm ndaj turqve myslimanë por edhe ndaj katolikëve, Venedikut. (B.H/Shuplaka)
