Mbyllet protesta e opozitës, çfarë ndodhi për rreth 2 orë në gjithë Shqipërinë

Ashtu siç edhe ishte paralajmëruar, në orën 20:00 është mbyllur protesta e opozitës në 12 pika të ndryshme të vendit në 12 qarqet e Shqipërisë ku qindra protestues bllokuan rrugët në shenjë proteste kundër qeverisë.

Në mbyllje të kësaj proteste nga Elbasani kryedemokrati, Lulzim Basha deklaroi se beteja kundër qeverisë nuk ka mbaruar dhe paralajmëroi se ajo do të ketë pikën kulmore të saj në protestën e 11 Majit (lexo këtu).

Ndërkohë nga Durrësi kryetarja e Lëvizjes Socialiste për Integrim Monika Kryemadhi deklaroi se opozita do të provojë çdo formë për të rrëzuar Ramën nga një pushtet që e mban në kundërshtim me vullnetin e popullit të tij. Sipas saj një gjë e tillë është e dukshme qartazi edhe nga përshkallëzimi i protestës ditën e sotme ku nga 5 qarqe zhvillohet në 12 te tilla (lexo këtu).

Protesta e sotme u shoqërua me disa incidente ku më të shpeshta kanë qenë në Fier pasi në dy raste tre ambulanca tentuan të kalojnë përmes protestuesve, por në njërin rast këta të fundit e morën si provokim dhe hapën dyert e saj për të parë nëse kishte të sëmurë brenda (lexo këtu).

Edhe në Gjirokastër ka patur incidente ku kryetari i degës së PD-së Dasho Aliko është përplasur me drejtuesit e policisë të cilët kanë tentuar të largojnë protestuesit nga rruga me pretendimin se protesta ishte e paligjshme (lexo ketu).

Ndërkohë në qarkun e Kukësit në fillim të marshimit të protestuesve ka pasur një përplasje midis tyre dhe policisë ku qytetarët kanë tejkaluar kordonin e forcave të rendit dhe kanë bllokuar për reth dy orë rrugën (lexo këtu).

Në Tiranë protesta është drejtuar nga Sekretari i Përgjithshëm i PD-së, Gazment Bardhi. Qytetarët kanë bllokuar kryqëzimin në sheshin Shqiponja ku kanë djegur barrierat e rrethimit të zonës ku po punohet për vijimin e ndërtimit të segmentit të Unazës së Re, kanë hedhur flakadanë si dhe kanë djegur goma makinash.

Situata është paraqitur përafërsisht e njëjtë edhe në Lezhë në kryqëzimin e Milotit, në Korçë, Berat dhe Shkodër ku qindra qytetarë kanë bllokuar rrugët dhe kanë hedhur thirrje kundër qeverisë dhe kryeministrit Edi Rama.

(F.GJ/FAXWEB.AL)