Sot në Kosovë janë zhvilluar zgjedhjet e jashtëzakonshme në katër komunat e veriut të vendit.
Mediat kosovare bëjnë me dije se procesi I votimit është mbyllur rreth orës 19:00 dhe pjesëmarrja e përgjithshme është rreth 42.42 %, nga 24 595 votues me të drejtë vote.
Zubin Potoku kryeson me daljen me të lartë të votuesve me 50.74%, respektivisht 4,331 votues, pasuar nga Zveçani me 45.17%, respektivisht 4,169 votues, në Leposaviq kanë dalë 41.57% të votuesve, repsktivisht 7550 votues dhe në Mitrovicën e Veriut kanë votuar 8,545 persona, 38.74%.
Kryetarja e Komisionit Qendror Zgjedhor ka njoftuar se procesi zgjedhor është zhvilluar pa probleme.
“87 vendvotimet në katër komunat veriore janë mbyllur në kohën e parashikuar. Duke u mbështetur në të dhënat preliminare procesi zgjedhor është zhvilluar pa ndonjë problem”, njoftohet nga KQZ.
Nga KQZ kanë njoftuar se në orët në vijim do të njoftojnë për rezultatet preliminare.
Gjithashtu, zëvendës drejtori i Policisë së Kosovës për rajonin e veriut të Mitrovicës, Besim Hoti në një prononcim për Telegrafin tha se procesi zgjedhor ka kaluar i qetë pa ndonjë incident të shënuar.
