Për ngjarjen e rëndë që ndodhi në Shkodër ku humbën jetën dy kushërinjtë minorenë (djem xhaxhallarësh), kanë folur prindërit e tyre.
Viktimat ishin Ervis dhe Sabian Tahiri, përkatësisht 13 dhe 15 vjeç. Për “Gazeta Shqiptare” Rifat dhe Naim Tahiri, dy baballarët e djemve të mbytur tregojnë sesi i kanë marrë vesh lajmin e kobshëm.
Rrëfimet e baballarëve të viktimave:
Përmes dhimbjes së thellë, Rifat Tahiri tregoi për “Gazetën Shqiptare” se si e mori lajmin e tmerrshëm. “Unë isha në shtëpi kur më ra telefoni. Nuk e njihja numrin. Më tha personi që më mori se fëmijëve u ka ikur lundra. Fillimisht nuk mendova asgjë të keqe. Pas pak më morën sërish dhe më thanë: ‘Eja këtu shpejt se të janë mbytur djali dhe nipi’. U nisa me shpejtësi, por nuk mund të bëja asgjë sepse djemtë ishin mbytur. Nuk mund ta besoj një gjë të tillë. Sabiani ishte djali im i vetëm, ndërsa kam edhe dy vajza. Është një ngjarje shumë e rëndë për të gjithë familjen tonë. Djemtë kanë shkuar për t’u larë në liqen si shumë herë të tjera, por fatkeqësisht u ka ndodhur ajo situatë e vështirë duke u marrë jetën”, – tha babai i viktimës. Sabian Tahiri.
Ndërsa, Naim Tahiri, babai i Ervis Tahirit u shpreh: “Nuk e di se kush më ka marrë në telefon. Mund të ketë qenë ora 16:00 kur më treguan për ngjarjen. S’e besoja dot. Madje nuk dola as nga shtëpia sepse nuk e dija se çfarë të bëja në ato momente. Kur kaloi edhe pak kohë, ma konfirmuan edhe zyrtarisht ngjarjen e rëndë. Nuk e di çfarë të them dhe nuk mund ta shpjegoj atë që ndjej në këto momente. Më pas erdhi policia dhe u nxorën trupat e pajetë. Nuk patëm nevojë të kërkojmë ndihmë sepse u nxorën shpejt. Nuk e kisha menduar kurrë se një gjë e tillë mund të ndodhë. Nuk e di se si ka ndodhur ngjarja, sepse nuk kam qenë aty. Më pas më tregoi djali tjetër që ishte në lundër. Dhimbja për ne është shumë e madhe”, tregon ai.
Discussion about this post