Kryesia e Kuvendit të Kosovës do të thërrasë seancë plenare për votimin e mocionit të opozitës për rrëzimin e Qeverisë së Kosovës, të mërkurën, me datën 10 maj.
42 deputetë të Kuvendit, 30 nga partitë opozitare dhe 12 nga partitë e tjera, përfshi edhe ato në pushtet dhe deputetë të pavarur kanë nënshkruar mocionin për rrëzimin e qeverisë aktuale.
Po ashtu edhe tetë deputetë të Partisë Demokratike të Kosovës së Kadri Veselit e kanë nënshkruar.
Kryetari i Kuvendit, Kadri Veseli, ka thënë se është evidente që nuk ka vendimmarrje të duhur në Kosovë.
“Gjendja në Kosovë nuk është ajo që duhet të jetë. Nuk është gjendje e kënaqshme. As unë nuk jam i kënaqur dhe as qytetarët e Republikës së Kosovës. Sidoqoftë, unë do ta vazhdoj komunikimin me partnerin e koalicionit (LDK-në). Nuk është opozita ajo që e rrëzon qeverinë, e thash do të bisedojmë me partnerin e koalicionit”, -ka thënë Veseli.
Nëse se ky mocion i opozitës dështon, atëherë brenda 90 ditëve të ardhshme nuk mund të ngrihet një mocion i ri i ngjashëm, që do të kishte si qëllim shkarkimin e qeverisë, raporton REL.
Ndërkaq, në rast se mocionin e mbështesin 61 deputetë në seancën plenare, atëherë mbetet në vendimin e presidentit të vendit që ta dërgojë vendin në zgjedhje të parakohshme.
(M.D/Shuplaka)
