“Më 30 Qershor shkojmë në zgjedhje”, reagon Veliaj: Ata mund të çojnë letra, serume dhe llokume

Nga një takim elektoral që zhvilloi në zonën e Baldushkut, kreu aktual i Bashkisë së Tiranës, Erion Veliaj ka komentuar vendimin e Presidentit Ilir Meta për ç’dekretimin e datës së zgjedhjeve e paracaktuar të mbahen me 30 Qershor të këtij viti.

Veliaj tha se mazhoranca është e vendosur të zbatojë Kushtetutën e vendit dhe se me datën 30 Qershor do të shkohet në zgjedhje ashtu siç është parashikuar sipas tij.

“Nëse këta do e mbajnë njëri-tjetrin me gajret dhe serume dhe do çojnë letra nul që s’kanë pikë vlere juridike, që s’kanë pikë vlere morale, si letra vetëvrasje politike, këta le t’ia çojnë njeri-tjetrit, por nuk jemi këtu për hallet e tyre, ne jemi këtu për hallet tona, për t’i zgjidhur dhe për të punuar për familjet tona dhe fëmijët tanë. Në datën 30 qershor, ata mund të çojnë letra, serume, llokume, njeri tjetrit sa të duan, por në datë 30 qershor, çdo njeri në Tiranë e Shqipëri do zgjohet në mëngjes dhe do i bëjë një pyetje vetes: Do votoj ose do merrem me pazarin që këta duan për 30 vitet që ikën apo do punoj për marrëveshjen që unë dua për 30 vitet që do vijnë?! Kjo është pyetja”, tha Veliaj duke shtuar se kjo datë sipas tij është kushtetuese dhe për asnjë arsye nuk do të ndryshojë.

Kryebashkiaku kujtoi edhe deklaratën e bërë dy ditë më parë nga Voltana Ademi e cila tha se i pëlqen që të gjuajë me bomba molotov kur merr pjesë në protestat e opozitë. “Unë i them merri lekët e rusit, po ik blej bukën për fëmijë, jo për fishekzjarre. Ik merrjani lekët rusit, nuk them të mos ia merrni, por ama çojini në shtëpinë tuaj për fëmijët tuaj”, u shpreh Veliaj.

“Imagjinoni Voltana, bashkia më e madhe e tyre është Shkodra. Shkodra ka përfunduar në një ditë kur kryetarja e bashkisë thotë “ta kisha një molotov ta hidhja në Tiran”. Po me lekët e molotovit ik mbill një pemë. Dhe arsyeja është se ajo nuk jeton në Shkodër ajo jeton te hotel Tirana dhe kur shkon në Shkodër i thonë ‘ooo mirë se erdhe’,”, theksoi ai.

Pavarësisht vendimit të Presidentit pë ç’dekretimin e datës 30 Qershor për zhvillimin e zgjedhjeve, Veliaj dhe Rama nuk e kanë ndërprerë axhendën e tyre elektorale, pasi edhe kryeministri gjatë ditës së sotme ndodhet në Burrel e më pas do të shkojë në Dibër për prezantimin e kandidatëve për kryetar bashkie.

(F.GJ/FAXWEB.AL)