Dy ditë më parë, në një dalje publike për mediat, kryeministri dhe njëherazi kryetari i Partisë Socialiste, Edi Rama, bëri të qartë se deri kur është i gatshëm të presë kundërshtarin politik Lulzim Basha për t’u takuar sërish.
Pasi i kërkoi që të mos përqëndrohet tek Kavaja dhe të largojë mendimin se zgjedhjet mund të shtyhen, ai i kërkoi të fokusohet për zgjidhje të krizës politike: “Fokusohu deri më 7 maj për një zgjidhje. Me 8 maj nuk jam më i gatshëm. Kësaj here për të detajuar ofertën që ka në tavolinë dhe jo për të vazhduar idenë e qeverisë teknike.”, u shpreh Rama të premten.
Sjellim në vëmendje se KQZ ka një kontratë me kompaninë sllovene “Cetis” për shtypjen e fletëve te votimit dhe në bazë të kontratës, kompanisë duhet t’i dorëzohen fletët e votimit deri në datën 7 maj, në mënyrë që ajo të ketë mundësinë t’i përgatisë ato për zgjedhjet e 18 qershorit. Meqë data 7, sot, i bie e dielë atëhere nesër, pra më 8 maj KQZ duhet të nisë prodhimin e fletëve të votimit.
Pas dy takime në prani të Kreut të Lartë të Shtetit, Bujar Nishani dhe vendimit të Ramës për tërheqje të kandidatit të Kavajës, nuk ka ende asnjë reagim nëse do të ketë një takim të tretë sot, dita e fundit e përcaktuar nga Rama për Bashën.
Ndërkaq, kryetari i Partisë Demokratike, Lulzim Basha, pritet që të mbledhë sot Kryesinë e PD-së për të diskutuar mbi përgatitjet e fundit për protestën e 13 majit.
“Shuplaka” mësoi nga burime në PD, se mbledhja do të nisë sot në orën 18:00, ku do të diskutohet mbi detajet e protestës së 13 majit.
(XH.A/SHUPLAKA)
