Florind Marini që lidhi dhe vrau italianin e moshuar dënohet nga gjykata italiane me 16 vjet burg. ”Më falni”, u ka thënë në shqip familjarëve të të moshuarit Ugo Cannozi, 82 vjeç, ish-polic, të cilin në bashkëpunim me të tjerë e vrau në shtëpinë e tij gjatë grabitjes.
Marini, 27 vjeç ka marrë gjykim të shkurtuar, duke përfituar një dënim me 8 vite më pak dhe një gjobë 400 euro për grabitjen.
Shqiptari është ekstraduar në Itali, pas largimit prej andej, me qëllim që t’i nënshtrohej gjykimit pas krimit të rëndë.
82-vjeçari që u vra barbarisht, pasi u lidh këmbë e duar, ishte i sëmurë. Ngjarja e rëndë ndodhi në 15 janar të vitit 2013. Pas vrasjes, grupi u largua nga shtëpia e tij me disa bizhuteri me vete dhe disa qindra euro.
Nëpërmjet përkthyesit, në shqip, Marini u ka kërkuar falje të afërmve të të ndjerit.
“I kërkoj falje për veprën e kryer djalit dhe familjes së viktimës. Unë kam ardhur në Itali për të dalë në gjyq dhe të dënohem për veprimet e mia. “, u ka thënë 27-vjeçari.
Marini ishte duke vuajtur dënimin për probleme droge në Shqipëri, kur është kërkuar ekstradimi nga autoritetet italiane.
Hetimet nxorën si konkluzion se ish-policit i është vënë jastëku sipër, derisa ai dha frymën e fundit. I moshuari ishte lidhur këmbë e duar me rrip.
Vrasja gjatë grabitjes ndodhi në bashkëpunim me kushëririn e të dënuarit Marini, Lorenc Marini 28 vjeç që tashmë është dënuar dhe Besnik Metushin 26 vjeç, të dy shqiptarë.
