Presidenti i ardhshëm Ilir Meta, vazhdon me diskursin e ashpërsuar kundër kryeministrit Edi Rama. Kësaj radhe në një takim në Berat, ai ka kujtuar deklaratat e ish-aleatit në koalicion se ai nuk ka arritur të bëjë gjërat që ka dashur për vendin, me justifikimin se e kanë penguar në timon.
Mirëpo Meta i kujton Ramës se në drejtimin e vendit, krah të djathtë ka patur ish-zëvendëskryeministrin Niko Peleshin dhe jo LSI-në.
“Ju e dini se që të jesh timonier duhet të kesh disa aftësi të veçanta. Nuk e di kush e ka penguar timonierin e deritanishëm sepse ai ka patur krah të djathtë Niko Peleshin dhe jo njeri tjetër, vetëm nëse e ka penguar Niko të mbajë përgjegjësi.
Zv.kryeministër ai kishte Nikon, nëse problem paska qenë ndërrimi i zv.kryeministrit, paska qenë problem i Nikos. Edi e humbi shansin, për të qenë një timonier i mirë, nuk ndërtohet shteti në mënyrë policeske” ka deklaruar Meta. (D.D/Shuplaka)
