Pas betimit të Ilir Metës si president, një vend për deputet mbetet i lirë në Parlamentin e Shqipërisë. Sipas listës që LSI ka dorëzuar në KQZ në 2013-ën, radha i vjen ish-ministrit Ylli Manjani, i cili ka mundësinë që pas shkarkimit të kthehet sërish në Parlament, deri në krijimin e qeverisë së re në shtator. Mirëpo, Manjani refuzon postin e deputetit.
I ftuar në “Ora News” Manjani ka deklaruar se nuk do ta pranojë mandatin e deputetit sepse ka planifikuar të marrë pushimet këtë verë.
“Nëse do ftohem nga KQZ për të marrë mandatin do ta refuzoj, patjetër që do ta refuzoj. Është formalitet i tepruar tashmë, nuk ka asnjë kuptim. Ky parlament ka marrë vulën e fundit të tij praktikisht, teorikisht qëndron në detyrë, por ky është një muaj pushimesh dhe unë kam planifikuar pushime. I qëndroj besnik fjalës që kam thënë se nuk është e thënë të jesh deputet për të bërë politikë, nuk më ka penguar asnjëherë mosqënia deputet për të bërë politikë. Kam bërë politikë dhe bisedoj me këdo fare lirisht pa qenë e nevojshme të jem deputet. Rrjetet sociale janë një opsion i mirë, por edhe Ora News është një televizion shumë i këndshëm për mua.”, ka deklaruar Manjani.
Me këtë vendim, Manjani i lë kështu vendin e lirë Ardit Çelës. (D.D/Shuplaka)
