Me njoftimin zyrtar të Policisë së Durrësit mbi ngjarjen e rëndë shënuar mbrëmjen e djeshme në lagjen nr. 1 të qytetit bregdetar, kanë dalë në dritë detaje të reja, konkrete nga dinamika e krimit.
Referuar këtyre burimeve, mësohet se si dy të dyshuarit kryesorë për vrasjen e shtetasit Agim Arapi, hynë brenda ambientit ku ai ushtronte aktivitetin dhe pasi mbyllën qepenin nisën të ushtronin dhunë fizike ndaj tij.
Agim Arapi ndërroi jetë si pasojë e problemeve me zemrën, ndërkohë që vëllezërit Kostandin dhe Kujtim Ekonomi e dhunonin. Gjatë kësaj kohe, jashtë ambienteve të supermarketit, Jurgen Kurti, shtetasit të cilit viktima i kërkoi paratë, qëndronte jashtë.
Detaje të Policisë së Durrësit:
Durrës, më 12.04.2017. Vrasin një shtetas për motive të dobëta. Policia pak minuta pas ngjarjes arreston dy autorët, vëllezër me njëri-tjetrin.
Në vendngjarje sekuestrohet një thikë.
Më datë 11.04.2017, rreth orës 19:55 në lagjen Nr.1 Durrës, Bulevardi “Epidam” ,në një dyqan ushqimor, ndodhi një konflikt për motive të dobëta, ku u plagos shtetasi Agim Arapi 51 vjeç, banues në Durrës.
I dëmtuari ndërroi jetë në Spitalin Rajonal Durrës.
Me të marrë njoftim menjëherë në vendngjarje shkuan Efektivet e Policisë, të cilët pak minuta pas ngjarjes kanë bërë të mundur identifikimin, kapjen dhe arrestimin e autorëve të dyshuar, konkretisht shtetasit:
- Kostandin Ekonomi 54 vjeç, banues në Durrës;
- Kujtim Ekonomi 50 vjeç, banues në Durrës.
Të arrestuarit janë vëllezër me njëri-tjetrin.
Mekanizmi i ngjarjes :
Palët janë konfliktuar me njëri- tjetrin me sende të forta dhe për motive të dobëta (për një tub aspirimi).
Autorët e arrestuar dhe shtetasi Jurgen Kurti, i shoqëruar mbrëmë nga Efektivet e Policisë, I detyroheshin viktimës që ti paguanin një shumë parash, 13 000 lekë të reja për tubin e aspirimit.
Viktima ia ka kërkuar shtetasit Jurgen Kurti paratë dhe në debat e sipër, kanë ardhur dhe janë përfshirë në konflikt edhe dy vëllezërit Ekonomi.
Këto dy të fundit e kanë futur viktimën, shtetasin Agim Arapi brenda në dyqanin ushqimor dhe kanë mbyllur qepenin, ku aty më pas e kanë goditur me grushta.
Gjatë kësaj kohe shtetasi Jurgen Kurti ka qenë jashtë dyqanit ushqimor (qepeni ishte i mbyllur dhe brenda ndodheshin viktima dhe autorët).
Gjatë kqyrjes së vendit të ngjarjes u gjet dhe sekuestrua në cilësinë e provës materiale një thikë.
Nga ekspertiza mjeko- ligjore u vërtetua se shtetasi Agim Arapi ka ndërruar jetë për shkak të problemeve që ka pasur me zemrën, ku nuk ka përballuar dot goditjet me grushta, të kryera nga autorët.
Materialet I kaluan Prokurorisë së Rrethit Gjyqësor Durrës për veprime të mëtejshme për veprat penale ”Vrasja me dashje”në bashkëpunim dhe”Prodhimi, mbajtja, blerja apo shitja pa leje e armëve të ftohta” parashikuar në nenet 76, 25 dhe 279 të Kodit Penal.
(XH.A/SHUPLAKA)
