Është nënshkruar një marrëveshje bashkëpunimi midis Drejtorisë së Përgjithshme të Arkivave në Shqipëri me Drejtorinë e Arkivave në Stamboll, kun ë bazë të të cilës vendi ynë ka marrë rreth 350 mijë dokumente që i përksin periudhës osmane.
Ka qenë vetë Drejtori i Arkivave, Ardit Bido, i cili në një deklaratë për mediat tha se këto dokumente hedhin dritë mbi historinë e panjohur të pushtimit osman në Shqipëri. Ai theksoi se në vazhdim do të vijnë nga Stambolli të tjera dokumente të kësaj periudhe dhe të gjithë historianët e studiuesit do të gjejnë gjithçka në Arkivat shqiptare.
“350 mijë dokumente kanë ardhur nga Stambolli të cilat datojnë nga shekulli XV-XX. Dokumentet janë me rëndësi historike. Ndërkohë, shumë shpejt do të vijnë të tjera dokumente nga Turqia. Gjatë vitit 2016 u morën rreth 5 mijë dokumente. Arkivi Kombëtar i Shtetit përmban sot tërësinë e dokumenteve pas pavarësisë, por edhe tërësinë e dokumenteve gjatë periudhës osmane. Është një mori e jashtëzakonshme dekumentare, që duhet të kalojë në një proces renditjeje. Në fund të vitit të ardhshme do jenë gati dokumentet për shfrytëzim. Kjo bëhet për të pasur një pamje të qartë historike mbi ato gjëra që nuk ishin të qarta. Do kemi gjithë pasurinë kombëtare mbi periudhën osmane. Asnjë studiues s’do duhet të shkojë në arkiva të tjera, do t’i ketë të gjitha këtu për Shqipërinë në periudhën osmane. Dokumentet që kanë ardhur janë të njëjta me origjinalet. Asnjë dokument i periudhës osmane nuk është sekret, por janë dokumente që nuk i dinim deri më dje. Ju takon historianëve t’i analizojnë. Dokumentet u përzgjodhën nga specialistët tanë që kanë shkuar në Stamboll. ”, tha Bido.
