“Më thoni që kam vetëm një fëmijë gjallë, e pata një përdore, por ju ftoh”, Rama tregon bisedën me Albertin, të vetmin e mbijetuar nga familja Cara

THUMANË– Familja Cara nga Thumana ka qënë një nga më të prekurar nga tragjedia e tërmetit të 26 nëntorit, duke humbur 6 anëtarët e saj. I mbijetuari i vetëm nga banesa është kryefamiljari Alberti, i cili u nis me avion nga Rinasi për mjekim të specializuar në Itali në gjendje të rëndë për jetën.

Pasditen e sotme, kryeministri Edi Rama ka qënë pranë të afërmve të tij, duke disktuar lidhur me rastin e tragjedisë së familjes. Të afërmit i kanë treguar kryeministrit se ende nuk i kanë treguar asgjë dhe se kryefamiljari mendon që i ka gjallë njerëzit e tij më të dashur.

PJESË NGA BISEDA:

Edi Rama: Ku ishte ti kur ndodhi kjo?

Sulë Cara: Pasi nxorra familjen time, mora vëllezrit dhe motrat. Ai nuk na përgjigjej. Në 5 e gjysmë kam ardhur këtu. Nuk patëm asnjë lloj komunikimi.

Erjon Braçe: Kur ra i madhi në 07:05 mund të kishte më marrë më shumë pasi të gjithë ishin duke punuar. Unë ulërita kur filloi të dridhej, zbritën të gjithë punëtorët, ai i shkreti rrëshkiti e kapi dorën keq, u ngrit dhe erdhi. Ai i 07:05 bëri shoshitjen e asaj që kishte ngelur. Ai e bëri dëmin edhe më të madh, pasi po shembeshin ato ajo peshë i ka masakruar të gjithë.

Sulë Cara: Mund të kishim ndihmuar edhe ne, por sa futeshim ne, binte tjerër dhe na çonte 4 orë mrapa.

Edi Rama: Sot unë e çova atë. O Zot kur ta marri vesh! Ai ka shtyllën kurrizore të goditur, plagë gjithandej. Do Zoti ka jetë e shpëton për vete.

I afërm: Na thotë të lutem më thoni që një fëmi më ka shpëtuar dhe jam në rregull. I thashë fëmijët i ke në rregull dhe ai na sheh por atëherë do ketë tragjedi. Ai u zhduk si familje. Na ka goditur vend.

Rama: O zot kishte autokolonë të vdekurish. Funeral autokolonë.

Sulë Cara: Ne i thamë doktorit që të mos i tregojë. Nuk ka asnjë dijeni. Ne do e përgatisim vetë por shumë vështirë.

I afërm: Ai në vetvete e di.

Edi Rama: E di thu? Ai më tha kur u përmend tha që kisha një përdore dhe dora nisi t’i ftohej. Aq mban mend.

I afërm: Atë ditë ka pasur edhe ditëlindjen e vajzës.

50 persona të vdekur, 900 të plagosur dhe 47 të shpëtuar, ky është bilanci i tërmetit. Kërkimet në Thumanë u mbyllën paraditen e djeshme, ndërsa në zonat e tjera u mbyllën pasdite. Trupi i fundit u nxorr pak pas mesnate në zonën e njohur si “2 Gjelat”. Toka vijon të dridhet ndërsa viktimat po përcillen një e nga një për në banesën e fundit.