Edhe pse kanë kaluar tre muaj pothuasje nga dita e zgjedhjeve, vetëm dje Policia e Lezhës ka arrestuar autorin e dyshuar të plagosjes së eksponentit të LSI-së.
Ngjarja që ndodhi në Shëngjin ishte një njollë e zezë për zgjedhjet. Për ngjarjen në pranga ka rënë Gentjan Marku, 26 vjeç, banues në Lezhë.
Sipas policisë, Gjykata e Rrethit Gjyqësor Lezhë, me vendimin Nr. 175 datë 28.06.2017, ka vendosur masën e sigurisë ” Arrest me burg” për veprat penale ” Kanosje apo dhunimi ndaj pjesëmarrësve në zgjedhje” “Prodhim dhe mbajtje pa leje e armëve luftarake dhe municionit” ” Plagosje e lehtë me dashje” kryer në bashkëpunim.
Policia e Lezhës sqaron se ditën e zgjedhjeve në Shëngjin, në bashkëpunim me shtetas të tjerë të proçeduar penalisht, është përfshirë në një konflikt fizik që fillimisht ka filluar si një konflikt verbal e më pas ka agravuar në një konflikt fizik e me mjete të forta mes tyre, ku njëri prej personave të përfshirë ka qëlluar me armë zjarri në ajër. Si pasojë e atij konflikti ka mbetur i dëmtuar lehtë Florian Dushku, një eksponent i LSI. Materialet proçeduriale i kaluan Prokurorisë së Rrethit Gjyqësor Lezhë për veprime të mëtejshme.
(E.K/SHUPLAKA)
