“Më vjen keq për njerëzit”, presidentja e Koresë së Jugut merret në pyetje pas skandalit korruptiv

Presidentja e rrëzuar e Koresë së Jugut, Park Geun Hie, po merret në pyetje nga prokurorët rreth një skandali korruptiv që solli edhe shkarkimin e saj.

Kur mbërriti në prokurori ajo kërkoi ndjesë, duke u shprehur se i vjen keq për njerëzit dhe se do të bashkëpunojë me besnikëri gjatë marrjes në pyetje.

Në kohën që ajo ishte presidente refuzoi që të merrej në pyetje, por humbi imunitetin kur gjykatësit mbështetën vendimin e parlamentit për ta hetuar atë.

Ajo mund të akuzohet për faktin se lejoi shoqen e saj të ngushtë Coi Son Sil të marrë para nga firmat e mëdha.

Kjo e fundit akuzohet për ryshfet dhe korrupsion.

Prokurorët presin që ta mbajnë Park Geun Hie në një seancë pyetjesh maratonë që pritet të zgjasë deri në mbrëmje. Një prej avokatëve të saj tha se një doktor po e viziton vazhdimisht, pasi nuk po duket mirë nga shëndeti.

Mbështetësit e presidentes së rrëzuar u mblodhën jashtë shtëpisë së saj në Seul, teksa u shoqërua nga policia në prokurori. Park Geun Hie është presidentja e parë e zgjedhur në mënyrë demokratike që rrëzohet në Korenë e Jugut.

Mijëra njerëz festuan në Seul për shkarkimin e saj më 10 mars.

Megjithatë, ka pasur edhe protesta nga mbështetësit e saj para Gjykatës Kushtetuese, kur u ndërmor vendimi. (M.D/ Shuplaka)