Agron Xhezairi u qëllua me automatik në oborrin e shtëpisë së tij në Ksamil. Ai ka qenë duke përcjellë kunatën që i kishte ardhur për vizitë dhe në momentin që po shkonte drejt makinës, një breshëri automatiku e ka rrëzuar në tokë.
Fillimisht ka qenë një plumb dhe Xhezairi mësohet të ketë thënë ‘’më vrave o qen’’, dhe pastaj një breshëri e gjithë plumbash ka rënë mbi të. Kunata e cila ishte pranë tij në momentet e fundit nuk ka arritur të shohë autorët pasi ata ishin fshehur në murin ndarës të shpisë së Xhezairit me fqinjin.
Policia e Sarandës vazhdon që pistën e parë të hetimit të ketë atë të gjakmarrjes, pasi djali i viktimës është i dyshuari kryesor për vrasjen e Aleksandër Bardhit,vëllai i ish-kryekomunarit në Kaçinar të Mirditës.
Vetë viktima I druhej një rasti të gjakmarrjes, pasi jo shumë kohë më parë i kishte shpëtuar një atentati me tritol të vendosur në makinën e tij.
Policia ka shoqëruar disa persona në polici po ende nuk ka një person të arrestuar në lidhje me ngjarjen.
