Nga PETRIT BECI
Në këto vitet e fundit, roli i medias elektronike është i pakuptimtë, pa bashkëveprimin dhe ecjen paralele, me zhvillimin e vrullshëm të rrjeteve sociale.
Një miku im italian, para pak ditësh, më dërgoi një material konfidencial, në lidhje me raportin e sotëm dhe ndërvarësinë ndërmjet ekranit të vogël dhe rrjeteve sociale. Sot, rreth 70% e njerëzve, në vendet e zhvilluara, informohen dhe shohin çfarë u intereson, nëpërmjet rrjeteve sociale. Krahas kësaj, në material theksohej që, nga studime në vendet e zhvilluara europiane, që do të thotë edhe në mediat elektronike më të zhvilluara dhe me audiencat më të larta, rreth 50-60% e të ardhurave arkëtohen nga të gjitha rrjetet sociale, numri i të cilave është në rritje e sipër. Kohët e fundit, ky fenomen po avancon dhe në tregun mediatik të brishtë, në vendin tonë.
Një media elektronike e zhvilluar, cilësore, nuk mund të kuptohet, pa pasqyrimin e programacionit të saj, në përgjithësi dhe të të gjitha programeve në veçanti, në faqet e kësaj medie në rrjetet dhe si rezultat pa pasqyrimin e saj në sistemin e përgjithshëm të rrjeteve sociale.
Në rast se në një media elektronike programacioni është mjaft i kushtueshëm, qoftë për kostot e prodhimit, teknikës, blerjes së të drejtave televizive, krejt ndryshe ndodh ne rrjetet sociale, ku produkti vjen me kosto të papërfillshme.
Mendoj se ka ardhur momenti, që dhe ne mediat “news” duhet të investohemi shumë në këtë drejtim.
Dy janë rrugët që të çojnë në këtë drejtim.
Së pari, lidhja e kontratave me agjencitë serioze të mbrojtjes së të drejtave, me formulën e saktë të vjeljes së të ardhurave dhe…
Së dyti, me krijimin e stafeve profesionale, për pasqyrimin e lajmeve dhe në përgjithësi të programacionit, në gamën jo të vogël të mundësive, që ofrojnë rrjetet sociale.
Varësia nga reklamat dhe marketingu klasik, për rritjen e të ardhurave në ekranet e mediave “neës”, sot është utopi dhe mosnjohje e realitetit mediatik.
Në xhunglën mediatike dhe varësinë ndaj politikës, biznesit, interesave shumëpalëshe, raporti ndërmjet audiencës në media televizive dhe reklamës, është i zhdrejte. Pra, mund të kesh audiencë, por nuk ke të ardhura dhe anasjelltas. Këtu përjashtohen programe të veçanta apo media të veçanta, ku roli i individit drejtues të programit, është përcaktues në tregun e reklamës, si rasti i Ardit Gjebresë apo ndonjë rast tjetër.
Në përgjithësi, tregu i reklamës është i lidhur ngushtë me interesat e politikës e të biznesit dhe funksionon ose si gjobëvënie, ose si mos transmetim i kronikave apo lajmeve negative,për segmente të caktuara të shtetit apo pushtetit apo të biznesit të madh, pronarët e të cilit sot i quajmë oligarkë. Kjo tendencë ka filluar dhe është shtuar me portalet e shumta, që janë krijuar këto vitet e fundit.
Ka dy variante për të shtuar të ardhurat në ekran.
E para, realizimi i programeve komerciale, që janë në modë, jo vetëm në vendin tonë, por për më tepër në vendin tonë, duke marrë në konsideratë, nivelin e ulët kulturor dhe ekonomik të qytetareve.
E dyta nga klikimet dhe shikueshmëria e medias apo programeve ose lajmeve tëveçanta, të prodhuara nga media elektronike dhe të pasqyruara në tregun e madh të rrjeteve sociale.
Kjo është rruga e vetme,për momentin, e shtimit të të ardhurave financiare në median tonë, jo se e them unë, por se e thotë përvoja e kohëve të fundit, e tregut tonë mediatik, të pasistemuar, si edhe e tregut mediatik të avancuare të sistemuar, europian, ku kërkesa dhe oferta është shpërngulur nga ekrani televiziv, në atë kompleks e gjithëpërfshirës të rrjeteve sociale.
Duke qenë se në vendin tonë reflektohen fenomenet e zhvillimit, në çdo fushë të jetës, dy deri tre dhjetëvjeçare me vonesë, edhe ecuria e ndërlidhjes mes medias elektronike dhe rrjeteve sociale është pjesë përbërëse e këtij raporti. Por duke parë zhvillimet dhe ecurinë e shikueshmërisëdhe përkushtimit në vendin tonë, këto vitet e fundit, të rrjeteve sociale, mendoj e theksoj se puna jonë duhet të përqendrohet e t’i kushtojmë një vëmendje shumë më të madhe këtij drejtimi, kuptohet pa neglizhuar, por duke forcuar kërkesën për cilësi dhe pasqyrim sa më gjithëpërfshirës, të çdo fenomeni politik, ekonomik, social, kulturor e sportiv, në ekranin e televizionit, të ndjekur shumë gjatë ditës e deri ne orët e pasdites dhe shpesh herë edhe në“prime time” ose natën vonë, kur ka ngjarje të kronikës, që për fat të keq, janë jo të rralla…
Prandaj, kombinimi i kësaj audience me punën nënjë nivel shumë më profesional, në pasqyrimin e programacionit, e sidomos të lajmeve, në rrjetet sociale, sot është e vetmja rrugë e balancimit të shpenzimeve me arkëtimet, në mediat “news”, përderisa pjesa e tortës së tregut të reklamave, që u takon këtyre mediave, është më tepër se modeste, për të mos thënë lëmoshë.
Discussion about this post