Policia e shtetit reagon një ditë pas publikimit të lajmit nga mediat italiane për sekuestrimin e 1215 kilogramë marijuanëtë ardhur nga Shqipëria.
Sipas policisë shqiptare, ende po vijojnë hetimet e përbashkëta për kapjen e autorëve të tjerë të përfshirë në trafik.
Në informacionet zyrtare të policisë, thuhet që gomonia me gjatësi rreth 8 metra dhe me dy persona në bord u ndalua edhe me ndihmën e një helikopteri të Guarda di Finanza.
Mirëpo nëse Policia e Shtetit po bashkëpunon me atë italiane, nuk dihet pse ky reagim i palës shqiptare vjen një ditë pas reagimit të palës së shtetit fqinj.
Sipas policia italiane, nëse droga do të shitej në treg do të sillte fitime në vlerën e 12 milionë eurove për organizatën kriminale.
NJOFTIMI I POLICISË:
“Në pasditen e djeshme u bë e mundur të ndalohet një gomone me gjatësi rreth 8 m dhe dy shtetas shqiptarë në bord të cilët po tentonin të trafikonin 1215 kg marijuanë në brigjet e Italisë së Jugut.
Pas disa orësh ndjekje në detin me dallgë të forta dhe me ndihmën edhe të një helikopteri të Guardia di Finanza u bë i mundur ndalimi i personave dhe sekuestrimi i lëndës narkotike dhe i mjetit lundrues.
Shtetasit me iniciale E.H, 38 vjeç dhe E.M. 35 vjeç u arrestuan në flagrancë nga Reparti Operativ i Guardia di Finanza i Pulias.
Në bashkëpunim me Policinë e Shtetit po vijojnë veprimet hetimore të përbashkëta për kapjen e autorëve të tjerë të përfshirë në trafik.” (D.D/Shuplaka)
