Një 41 vjeçar me origjinë kosovare, i identifikuar si Qerim Lumi, banues në Treviso, ka përfunduar në prangat e policisë italiane për veprën penale të trafikimit ndërkombëtar të lëndëve narkotike.
41 vjeçari ishte shpallur në kërkim në kuadër të megaoperacionit të koduar “Alba Bianca”, i cili u realizua në shtator të vitit të shkuar.
Në këtë operacion u identifikuan 40 persona trafikantë droge, 30 prej të cilëve përfunduan në prangat e “Guardia di Finanza” në Trento.
Lumi shërbente si ndërlidhës dhe transportues i drogës.
Gjatë operacionit, policia sekuestroi 120 kg drogë, heroinë, kokainë dhe marijuanë, me një vlerë prej 20 milion eurosh në tregun e pakicës.
Po ashtu nga operacioni u sekuestruan edhe 8 automjete të përdorura për transportin e drogës dhe mbi 100 mijë euro.
Operacioni kishte shkaktuar një goditje të rëndë në kanalet e furnizimit të drogës nga Evropa veriore në Itali, duke konfirmuar rëndësinë e boshtit të Brennerit si një udhëkryq për trafikun ndërkombëtar.
Discussion about this post