Gjykata Administrative e Shkallës së Parë Vlorë ka pranuar ditën e sotme padinë e dy vëllezërve Kacelli, për të marrë në shqyrtim emrin e rrugës ‘Mehmet Shehu’.
Osman dhe Mirvjen Kacelli kanë paditur Këshillin e Bashkisë Mallakastër, duke e cilësuar emrin e kësaj rruge si një provokim të hapur kundrejtë familjarëve të cilëve u janë persekutuar të afërmit e tyre në regjimin komunist.
Kujtojmë që padia ka nisur vetëm nga emri i një rruge.
I referohemi këtu rrugës që të çon drejt uzinës së përpunimit të thellë të naftës në Ballsh e cila mban emrin e diktatorit Mehmet Shehu nga vitin 2002. Emri i një vrasësi të regjimit komunist ka bërë të ndiehen të diskriminuar djemtë e Jonuz Kacelit, i cili u torturua dhe u vra nga Mehmet Shehu gjatë po këtij regjimit. Ata kërkojnë heqjen e emrit të kësaj rruge, por Këshilltarët në Bashkinë e Mallakastrës e mbajnë me votë emrin e diktatorit në këtë rrugë.
Ndërkohë që jemi në pritje të vendimit të Gjykatës Administrative të Vlorës, djemtë Kacelli nuk kërkojnë asnjë dëmshpërblim, veç atij moral.
