Kejdi Mehmetaj, deputetja e LSI-së, deklaroi gjatë pjesëmarrjes së saj në Parlamentin Europian se largimi, krimi dhe droga nuk mund të jenë e ardhmja e të rinjve.
”Me Zv.Kryetarin e Parlamentit Europian Z.Fabio Massimo Castaldo, theksova se nuk mund të ketë zhvillim në Shqipëri pa luftuar së pari trafikun e drogës dhe krimin e organizuar që ka marrë peng të ardhmen e të rinjve shqiptarë.”, thekson Mehmetaj.
Sipas saj këto dy ditë në Parlamentin Europian iu kushtuan për të ndërtuar ura ndërmjet parlamentarëve të Ballkanit Perëndimor dhe nxitur një axhendë politikash rinore.
”Bashkimi Europian është e ardhmja e Shqipërisë, por që të avancojmë në çeljen e negociatave duhet së pari të ndërtojmë një shtet të qëndrueshëm dhe që zbaton ligjet.
Për mua si përfaqësuese e të rinjve në parlament, është e rëndësishme të ndërtojmë gjithë mekanizmat e duhur për të luftuar papunësinë ndërmjet të rinjve dhe për të ngritur një sistem arsimor cilësor.
Largimi, krimi dhe droga nuk mund të jenë e ardhmja e të rinjve, ndaj nuk do të rreshtim së luftuari për një Shqipëri të drejtë, të barabartë, që krijon shanse për të gjithë.”, përfundon deputetja.
Bashkë me të, edhe deputeti demokrat Klevis Balliu rrëfyen shqetësimet e të rinjve shqiptarë dhe rrugët se si mund të zgjidhen ato.
(V.G/Faxweb)
