Enri Çeno, Sekretar për marrëdhëniet diplomatike në PD foli sot në studion e emisionit “Pushteti” në Fax News për fitoren e Melonit në Itali dhe “leksionin” që i dha të djathtës shqiptare.
Çeno u shpreh se më në fund brenda PD-së po diskutohet për një linjë të mirëfilltë ideologjike dhe se kryeministrja e sapozgjedhur në Itali është shembulli për tu ndjekur. Duke u bazuar te fjalimi përmbyllës i Melonit, ai tha se qeveria e vogël që ajo përmendi është pikërisht ajo që nevojitet për një komb më të fortë, dhe se një frymë e tillë i nevojitet shoqërisë shqiptare.
“Duhet mirëpritur që brenda partisë Demokratike po diskutohet për linjë të mirëfilltë ideologjike sepse brenda saj kam grupe interesi dhe aty të gjithë duhet të përfaqësohen. Fitorja e Melonit solli një frymë shprese për një pjesë të shoqërise por edhe frikë brenda kombit Italian dhe jo vetëm, në shumë media u quajt si fashiste.
Ajo nuk ka asnjë lidhje me Partinë fashiste madje e ka sulmuar në shumë deklarata të saj. Shumë politikanë nuk e kuptojnë se çfarë është fashizmi, shteti nuk është thjesht rregullator por operatori i vetëm. Po të dëgjojmë fjalimin e saj përmbyllës ajo përmend një qeveri të vogël për sa më shumë liri individi dhe për një familje, komunitet dhe komb më të fortë. Ne për këto kemi nevojë, e gjithë shoqëria shqiptare.
Me ardhjen e Melonit, nëse do bënim një krahasim të qeverive që janë në Europë, më pranë fashizmit ështe qeveria e Ramës. Sepse ndërhyrja e shtetit në çdo qelizë të ekonomisë ngjan me nazismin dhe fashizmin”-tha Çeno.
